5 عادات صباحية تجعل خسارة الوزن صعبة

  • 1- مش بتشربي كوباية مية بعد ما تصحي من النوم: سواء ده كان بسبب نسيانك او عدم معرفة منك فكتير من الاشخاص بينسوا يعملوا العادة دي الصبح, شرب كوباية مية اول ما تصحي من النوم هي روتين بسيط جدا لكن ليه فوايد كتير, ولو بتنسي تشربي اول ما تقومي ممكن تخلي كوباية المية جنب السرير عشان اول ما تقومي تشربي, المية بتساعد على تسريع عملية التمثيل الغذائي, وبتخلي المعدة مستعدة لاستقبال وجبة الفطار بشكل اسهل, هتساعد على تنضيف الجسم من السموم, لو انتظمتي على عادة شرب كوباية المية كل يوم الصبح هتلاحظي انك بدأتي تفقدي دهون الجسم بشكل اسرع. 2- مش بتخلي الشمس تدخل المكان: ضوء الشمس مفيد لاي وقت في اليوم, ولكن هو مفيد بشكل خاص اول ما تصحي من النوم, لان اشعة الشمس بتساعد على عملية التمثيل الغذائي انها تشتغل بشكل صح, وبتساعد جسمك انه يبقى مستعد لوجبة الفطار وكمان تتهضم بشكل صح, كمان هتتفاجئي من الطاقة اللي هتديهالك اشعة الشمس, 20 او 30 دقيقة من اشعة الشمس الصبح هتبقى مفيدة جدا لكتلة الجسم والمساعدة في عملية انقاص الوزن, عشان كده لو انتي بتنامي وانتي قافلة الستاير لازم تخلي من عاداتك الصباحية انك تفتحيها اول ما تقومي من النوم. 3- بتتخطي وجبة الفطار: في اشخاص كتير مش بيحبوا ياكلوا حاجة الصبح, لكن وجبة الفطار تعتبر اهم وجبة في اليوم ومينفعش تتخطيها لو انتي بتحاولي تخسري وزن, لكن في نفس الوقت حاولي تتجنبي الحاجات اللي فيها سكريات او مواد حافظة كتير, كلي وجبة خفيفة ومغذية في نفس الوقت, ممكن تشربي سموزي لانه سهل التحضير ومغذي وتقدري تاخديه معاكي وانتي بتتحركي عادي, وممكن تاكلي حاجة بسيطة زي طبق صغير من الشوفان او زبادي مع التوت هيكون كافي جدا عشان تبدأي يومك. 4- بتتخطي التمارين الصباحية: سواء اليوجا او الجري, حاولي انك تدخلي التمارين في روتينك الصباحي كل يوم, ممكن يكون صعب او ناس كتير بتكسل عن التمرين الصبح اول ما تصحى من النوم, لكن هو مفيد جدا لو عايزة تخسري وزن, لان الرياضة هتساعد على زيادة عملية التمثيل الغذائي وهتنشط جسمك, كمان بتقلل الشهية, يعني لو استبدلتي وجبة الفطار الميانة بالسعرات الحرارية بجلسة يوجا لمدة 15 دقيقة او الجري هتلاقي نفسك بتميلي اكتر انك تاكلي وجبة فطار صحية. 5- النوم الزيادة: اكيد لازم تنامي كل يوم عدد ساعات متقلش عن 7 – 8 ساعات, ولكن ميكونش اكتر من 10 ساعات, لان النوم الزيادة هيزود مؤشر كتلة الجسم وهيزود دهون البطن, لان الجسم بيكون متوقع تغذية تدخله لكن لما تنامي بدل ما تاكلي ده هيأدي لانتاج خلايا دهنية اكتر عشان يحصل على التغذية اللي لزماه, وكمان النوم المفرط هيأثر على عملية التمثيل الغذائي وعلى ميعاد وجبة الفطار بتاعتك, والحفاظ على اوقات الوجبات منتظم مهم لعملية فقدان الوزن.