دليلك الكامل عن الكيراتين

  • أولا الكيراتين : 1- ايه هو الكيراتين؟ الكيراتين هو بروتين طبيعي وهو المكون الأساسي للشعر والبشرة والظوافر. والكيراتين هو المسئول عن قوة الشعر ومظهره اللامع والناعم، وبمرور الوقت بنفقد الكيراتين الطبيعي الموجود في الشعر نتيجة لاستخدام السشوار والكيماويات زى الصبغة وكريمات الفرد والشامبوهات. 2 – الكيراتين اللى بنعالج بيه شعرنا بيتكون من ايه ؟ بيتكون الكيراتين المستخدم في معالجة الشعر من الفورمالدهايد واللى بيساعد على فرد الشعر لفترة طويلة، وفيه كمان البلسم والى بيرطب الشعر و ينعمه ونسبة من الكيراتين اللى بيدى الشعر القوة والنعومة ويرجعله المظهر الصحي. 3 – ايه هى خطوات معالجة الشعر بالكيراتين؟ • بنغسل الشعر كويس باستخدام شامبو الأطفال أو باستخدام شامبو مخصص للشعر المعالج بالكيراتين. • هنجفف الشعر باستخدام السشوار على درجة حرارة متوسطة. • هنقسم الشعر لخصل ونحط الكيراتين على كل خصلة ونسيب مسافة 1 سم من فروة الرأس ونسرح الشعر ونسيبه حوالي 10 دقائق ونجففه بالسشوار تانى. • هنستعمل مكواة فرد الشعر (baby liss) عشان نضمن تغليف الكيراتين للشعر. • نسرح الشعر بحرص للوراء ونسيبه مفرودا ويراعي عدم غسل الشعر أو تعريضه للرطوبة وعدم لفه أو ربطه لمدة 72 ساعة على الأقل. • هنستعمل مكواة الشعر يومياً بعد معالجة الشعر بالكيراتين لمدة تتراوح من 3 إلى 5 أيام حسب ملمس الشعر قبل المعالجة. • هنشطف الشعر بعد المدة المحددة باستخدام شامبو خالي من مادة كلوريد الصوديوم وممكن استخدام شامبو الأطفال أو شامبو مخصص للشعر المعالج بالكيراتين. 4 – هل ينفع استخدام الكيراتين لجميع أنواع الشعر؟ الكيراتين بنستعمله لفرد الشعر المجعد عشان يديله اللمعة، وبيستخدم لفرد التموجات البسيطة والتموجات العنيدة زى الموجودة في الشعر الأفريقي، وممكن نستعمله على الشعر المصبوغ أو الشعر اللى اتفرد قبل كده بكريمات الفرد التانية. مينفعش نستعمل الكيراتين على الشعر الضعيف والشعر شديد التلف. وعموما لو كان الشعر يتحمل درجة حرارة توصل إلى 450 درجة أثناء فرده بالمكواة فيمكنه تحمل الفرد بالكيراتين. 5- هل ممكن نلاقى كيراتين خالي من الفورمالدهايد ؟ الكيراتين لازم يكون فيه نسبة من الفورمالدهايد أو بدائله الكيميائية عشان يفرد الشعر. وفى بعض الشركات اللي تنتج الكيراتين وبتدعي انه خالي من الفورمالدهايد، عشان كده لازم نقرأ ملصق المكونات كويس ودى أسماء بعض المركبات الكيميائية اللي بتعمل بنفس طريقة الفورمالدهايد ولها نفس آثاره الجانبية وأضراره: جلوتارالدهايد، أوكسالدهايد، ثيوجليكولات الأمونيوم (واللي بيستخدم في كريمات الفرد الدائمة)، ميثلين جليكول. 6 – ازاى نحافظ على الشعر المعالج بالكيراتين أطول فترة ممكنة؟ – بلاش نغسل شعرنا كثير بعد معالجته بالكيراتين. – عند غسل الشعر يفضل استخدام شامبو مخصص للشعر المعالج بالكيراتين أو شامبو الأطفال. – عدم الإفراط في استخدام مكواة الشعر بعد معالجة الشعر عشان متتسببش في تكسر الشعر. – تغطية الشعر لمل ننزل حمام السباحة أو البحر لحمايته من مادة كلوريد الصوديوم. – مينفعش صبغ الشعر قبل أو بعد معالجة الشعر بالكيراتين لمدة أسبوعين على الأقل. 7 – اضرار الكيراتين معظم اضرار مخاطر فرد الشعر بالكيراتين بتيجى من مادة الفورمالدهيد (الفورمالين) المسرطنة الموجودة فى مستحضرات الكيراتين لفرد الشعر و اللى بتزيد من احتمالات الاصابة بالسرطان لما الجلد يمتصها و بتعمل التهابات للجهاز التنفسى عند استنشاقها وعشان ظهرت منتجات فرد الكيراتين خالية من الفورمالدهايد و لكنها اقل فاعلية وبيزودولها مادة السلفات عشان تخلى الكيراتين متماسك على الشعر.